Олунньу 21 күнүгэр Майаҕастааҕы «Түмсүү» норуот айымньытын киинигэр, 2026 сылга «Арассыыйа норуоттарын сомоҕолоһуулара», Саха сиригэр – «Култуура», Уус Алдан улууһугар – «Түмсүү уонна бииргэ үлэлээһин», Хоро нэһилиэгэр «Доруобуйа уонна чэбдигирии сылларын» чэрчитинэн, «Төрөөбүт тыл уонна сурук бичик» күнүгэр аналлаах оскуола үрдүкү кылааһын оҕолоругар III -c төгүлүн ыытыллар «Мүрү оҕолоро» диэн оскуола үрдүкү кылааһын оҕолоругар аналлаах тэрээһин буолан ааста. Бу күрэххэ Мындаабатааҕы спортивнай хайысхалаах орто оскуола уонна Василий Андреевич Протодьяконов — Кулантай аатынан Майаҕастааҕы орто оскуола хамаандалара, уопсайа 17 оҕо кыттыыны ылла. Майаҕас оҕолоро 2 хамаандаҕа арахсан уопсайа 3 хамаанданан күрэхтэстилэр.
Тэрээһин үөрүүлээх арыллыытын кэннэ оҕолор бэйэ бэйэлэригэр хамаандаларын билиһиннэрдилэр, эҕэрдэ нүөмэрдэрин бэлэхтэстилэр. Күрэх бастакы түһүмэҕинэн «Толкуйдаа, Оонньоо, Кыай» биктэриинэ боппуруостарыгар эппиэттээһин буолла. Боппуруостар сүрүннээн Саха тылыгар уонна литературатыгар олоҕурдулар. Иккис түһүмэх медиапрезентацияны көрөн боппупуостарга эппиэттээһин буолла. «Бу кимий» диэн Сахабыт сирин биллэр-көстөр дьоннорун хаартыскаларын аҥарынан эрэ көрөн таайдылар. Үһүс түһүмэх «Тыллары хартыынанан таай», манна хартыыналарга кистэммит тыллары таайдылар. Төрдүс түһүмэх «Сахалыы киинэлэр ырыаларын таайы». Бэһис түһүмэх «Өбүгэ оонньуулара», манна «кириэс тэбиитэ», «кыл мээчигэн сыал быраҕыыта», «хомуур»», «хаамыска хомуйуута», «чороон», «быалаах хапсаҕай» көрүҥ аайы күрэхтэргэ хамаандаттан биирдии кыттааччы илин-кэлин түһүстэ.
Түмүккэ 15 очукуолаах Майаҕас орто оскуолатын бастакы хамаандата кыайыылаах үрдүк аатын ылла, Мындааба орто оскуолатын хамаандата иккис, Майаҕас орто оскуолатын иккис хамаандата үһүс миэстэни ыллылар.
Тэрээһин Квест оонньуунан, доҕордоһуу биэчэринэн түмүктэннэ.
